Basisvarer du treng for å bake sunnare og sukkerfritt

Det første du må byte ut når du skal bake sunnare og sukkerfritt, er sukkeret. Då treng du naturlegvis sukkererstatningar. Desse finn du garantert i ein helsekostbutikk eller i nettbutikkar som sel helsekostprodukt, men det er òg fleire og fleire daglegvarebutikkar som har dei i hyllene sine. Informasjon om dei ulike sukkererstatningane og eigenskapane deira finn du på side 14–20.

Sukkererstatningar eg bruker i oppskriftene mine
Sukrin gold
Sukrinmelis
Sukrin+ eller Finesse (du kan velje)
Sukrinsirup gold

Du treng ikkje ha alle desse i skapet. Finesse kan erstatte både Sukrinmelis og Sukrin+. Det betyr at viss du har Sukrin gold, Finesse og Sukrinsirup gold, så har du dei viktigaste.

I tillegg bruker eg dadlar og banan som søting.

Andre «spesialprodukt» som er fine å ha
Sukkerfri sjokolade – både lys, mørk og kvit.
Eg føretrekker merket Cavalier eller Sukrin sin variant.

Ekte vaniljepulver
Dette gir ein ekstra rik og god vaniljesmak. Ei krukke er dryg i bruk og varer lenge. Det held gjerne med 1⁄2 eller 1⁄3 ts i ei oppskrift. Du må ikkje ha vaniljepulver, men det gir det vesle ekstra til oppskriftene. Eg bruker merket Helios.

Elles er det nokre få oppskrifter i boka der eg bruker lakrispulver (Helios), ferdig sukkerfri marsipan, spira bokkveite eller Fiberfin, men det står det informasjon om i oppskriftene.

Utanom dette bruker eg heilt vanlege ingrediensar frå daglegvarebutikk. Mykje har du nok i skap og kjøleskap frå før, elles handlar du inn det du treng etter kvart som du lagar oppskriftene du ønsker.